Чӑваш Енре чи хастар кӗмӗл волонтерсене палӑртнӑ. Конкурса пӗтӗмпе 32 хастар ватӑ хутшӑннӑ. Вӗсене 4 номинацире хакланӑ.
«Ҫӗнтерӳ волонтерӗ» номинацире Етӗрне тӑрӑхӗнчи Мария Кольцова «Хӑвӑн ӑшшуна ыттисене парнеле» программӑпа палӑрнӑ.
«Волонтер-наставник» номинацире Элӗк тӑрӑхӗнчи Виталий Ефимов «Шахмат — ӑнӑҫу ҫулӗн шанчӑклӑ ҫӑлкуҫӗ» практикӑпа мала тухнӑ. Шупашкарти Ирина Александрова — чи лайӑх «Эко-волонтёр». «Социаллӑ экспресс» номинацире те Шупашкарти кинемей ҫӗнтернӗ¸ вӑл — Алевтина Степанова. Ватӑ ҫын «Ретрогварди» театр студине ҫӳрет.
Ҫӗнтерӳҫӗсене кӗмӗл волонтерсен республикари форумӗнче чыслӗҫ. Вӑл авӑн уйӑхӗн 9-мӗшӗнче 11 сехетре Ҫамрӑксен театрӗнче пуҫланӗ.
Шупашкарта пурӑнакан Вера Ятманова паян, авӑн уйӑхӗн 26-мӗшӗнче, 101 ҫул тултарнӑ.
Ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ пӑхса пулӑшать. Кинемее асӑннӑ центрӑн пай пуҫлӑхӗ Татьяна Ильина саламланӑ.
Вера Ивановна Етӗрне районӗнче ҫуралнӑ. Вӑрҫӑ ҫулӗсенче ӑна окоп чавма янӑ. Чӑваш ял хуҫалӑх институтӗнчен зоотехника вӗренсе тухнӑ хыҫҫӑн зоотехникра ӗҫленӗ.
Упӑшкипе икӗ хӗр ҫуратса ӳстернӗ.
Ҫитес ҫул Республика кунӗ ӑҫта иртесси паллӑ. Йӑлана кӗнӗ тӑрӑх, паллах, Шупашкарта пулӗ. Тата уяв мероприятийӗсем Етӗрне округӗнче иртӗҫ. Республика кунне ирттерме шӑпах ҫак округ тивӗҫнӗ.
Аса илтерер: кӑҫал уяв Шупашкарта тата Тӑвай округӗнче пулнӑ. Сӑмах май, ҫитес ҫул Чӑваш автономи облаҫӗ йӗркеленнӗренпе 105 ҫул ҫитет.
Чӑваш Енре салат ҫулҫи туса илме тытӑнасшӑн. Теплицӑсем Етӗрне округӗнче пулӗҫ. Унта ЧР ял хуҫалӑх министрӗ Сергей Артамонов ҫитсе курнӑ.
«Позитив» компани 4 гектар ҫӗр ҫинче теплица тӑвасшӑн. Кӑҫал 2400 тӑваткал метрне ҫаврӑнӑша кӗртме палӑртнӑ. Унта салат ҫулҫи кӑна мар, каярахпа хӑяр, помидор та лартса ӳстерме палӑртнӑ. Тен, пурӑна киле ытти пахча ҫимӗҫ те пулӗ.
Продукцие ҫавӑнтах упаковка туса лавккасене ӑсатӗҫ. Палӑртмалла: унччен республикӑра ҫавӑн чухлӗ салат никам та ҫитӗнтермен.
Етӗрне округӗнчи «Вирьял» ансамбль регионсен хушшинче иртнӗ славянсен ӳнерӗн фестивалӗнче палӑрнӑ. Вӑл «Вырӑс уйӗ» /выр. «Русское поле»/ ятпа иртнӗ. Ансамбль фестивальте ятарлӑ премие тивӗҫнӗ. «Халӑх йӑли-йӗркине упранӑшӑн» ятлӑ вӑл.
Палӑртмалла: фольклор ушкӑнӗ 1990 ҫулта Тури Ачак культура ҫурчӗ ҫумӗнче йӗркеленнӗ. Ӑна пуҫарма РФ тата ЧР культурӑн тава тивӗҫлӗ ӗҫченӗ Аркадий Айдак сӗннӗ.
Саламлатпӑр пултаруллӑ ушкӑна!
«Вӑт ку музей тӑк музей! Юлашки куна та усӑллӑ ирттерес терӗҫ те «Эткер» сменӑри ачасем — Етӗрне районӗнчи Тури Ачак ялӗнчи ӗлӗкхи чӑваш кил-ҫyртне ҫитрӗмӗр. Тӗлӗнмелли, курмалли, мӑнаҫланмалли питӗ нумай куртӑмӑр, илтрӗмӗр», — хыпарланӑ Ирина Диарова чӑваш чӗлхи вӗрентекенӗ халӑх тетелӗнчи хӑйӗн страницинче. Ачасене тырӑ авӑртмалли ал арманӗ, шут шӑрҫи, тури чӑвашсен тумӗ килӗшнӗ иккен. Вӗсем Аркадий Айдак пуканӗ ҫине ларса пӑхнӑ.
Етӗрне муниципаллӑ округӗнче Пӗтӗм тӗнчери плэнер иртнӗ. Ӑна Тури Ачак ялӗнче йӗркеленӗ.
Плэнера хутшӑнакан ӳнерҫӗсем хӑмла темипе те ӳкернӗ. Хӑмла ку округа мӗншӗн ҫывӑх пулни паллӑ ӗнтӗ.
Ҫавӑн пекех ӳнерҫӗсем 19-мӗш ӗмӗрти чӑваш хресченӗн чӗрхуҫалӑх музейӗн заведующийӗн Людмила Петровӑн портретне те ӳкернӗ.
Етӗрне округӗнче автотуристсем валли канмалли кун маршрутне уҫасшӑн.
ЧР вице-премьерӗ - экономика министрӗ ҫапла палӑртнӑ: округра инфратытӑма, сервиса укҫа хывма, автотуристсене йышӑнма хатӗр кану базисем пур. Автотурист пӗр кунра темиҫе паллӑ вырӑна ҫитме пултарать.
Министр каланӑ тӑрӑх, маршрутсенчен пӗри «Сурские зори» кану базинчен Ильин тӑвӗ таран выртма пултарать. Ку - историре юлнӑ вырӑнсем. Унта Емельянов Пугачев ҫарӗсем тӑнӑ, Тӑван ҫӗршывӑн Аслӑ вӑрҫи вӑхӑтӗнче ҫав тӑрӑхра тыл ӗҫченӗсем Сӑр хӳтӗлев чиккине чавнӑ.
Етӗрне муниципаллӑ округӗнче арҫын путса вилнӗ. Вӑл 33 ҫулта пулнӑ. Унӑн виллине ҫӑлавҫӑсем шыранӑ.
Арҫын Ҫимеккасси ҫывӑхӗнчи пӗвере шыва кӗнӗ. Вӑл путни пирки ҫынсем пӗлтернӗ. Арҫынна ӗнер ҫӗрлечченех шыранӑ, паян ирхине ӗҫе малалла тӑснӑ. Паян унӑн виллине тупнӑ.
Республикӑри 10 округ Сосновский пултӑранӗпе кӗрешме хушма укҫа ыйтнӑ. Вӗсен йышӗнче - Улатӑр, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Етӗрне, Елчӗк, Патӑрьел округӗсем. Вӗсене пӗтӗмпе 4,5 миллион тенкӗ уйӑрса парӗҫ. Ку укҫапа 2,85 тӑваткал ҫухрӑм лаптӑк ҫинчи Сосновский пултӑранне пӗтерме май парӗ.
Палӑртмалла: ҫулталӑк пуҫланнӑранпа ҫак наркӑмӑшлӑ курӑкпа кӗрешме 11,4 миллион тенкӗ уйӑрнӑ.
+30.3 °C